Coñecedoras da situación xudicial e penitenciaria en que se encontran os cidadáns galegos José Manuel Sanches e Santiago Vigo, procesados na  Audiencia Nacional, afastados da Galiza desde Decembro de 2007 e internados a centos de quilómetros dos seus lugares de orixe no centro penitenciario de Aranjuez (Madrid), as persoas abaixo asinantes queremos manifestar o que segue, en nome dos sectores da sociedade galega sensibilizados a respecto desta problemática:

- Que o encarceramento destas duas persoas e, por extensión, do resto do colectivo de pres@s galeg@s, en centros situados fora da Comunidade Autónoma da Galiza, vulnera as vixentes lexislacións penitenciarias española e internacional* e supón unha condena engadida á prisión preventiva. Alén disto, implica a súa separación da realidade nacional, cultural e socio-afectiva de que proceden  (coas negativas consecuencias individuais e colectivas imaxinables).

Así  mesmo, denunciamos  o  papel  de  tribunal  de  excepción  que  a  Audiencia  Nacional  xoga  no seu procesamento, dado  que  vulnera  o principio  constitucional  de  territorialidade (art. 24.2 C.E.:  dereito  ao  encausamento  por  parte  do tribunal natural do lugar onde sucederan os feitos de que  estean acusad@s).

- Que @s familiares, amig@s e compañeir@s dos presos están directamente afectad@s por esta medida extraordinaria, unha vez que se ven obrigad@s a desprazárense semanalmente centos de quilómetros para visitalos 40 minutos no citado centro. A realización destes desprazamentos supón un importante trastorno, o desembolso mensal de elevadas cantidades de diñeiro e un risco acrecentado de accidentes en estrada, dado que as viaxes se realizan en reducidos períodos de tempo para ser conciliables cunha vida laboral normal.

- Que, aliás, a permanencia de José Manuel Sanches e Santiago Vigo en prisión preventiva -réxime que se pode prolongar anos sen celebración de xuízo- é unha medida desproporcionada, trastorna seriamente o seu desenvolvemento persoal e psicosocial é un tratamento de todo ponto innecesario.

- Que nos alarma profundamente o tratamento incorrecto e arbitrario de que foron obxecto en máis de unha ocasión José Manuel Sanches e Santiago Vigo con respecto aos seus réximes de comunicación, atención hixiénico-sanitaria, condicións de vida en prisión, isolamento, recepción de obxectos que precisam, etc.

É por todo isto que apoiamos a Plataforma Cidadá ‘Que volten a casa!’ e as medidas xurídicas, informativas, sociais e institucionais tendentes a conseguir:

1º O respecto de todos os dereitos de que son suxeitos estes cidadáns galegos; dereitos que nun Estado democrático non poden verse mermados, en virtude do respecto debido ao principio constitucional de presunción de inocencia (art. 24 C.E.).

2º A transferencia de José Manuel Sanches e Santiago Vigo a un centro penitenciario situado na Galiza, rematando así coa medida ilegal da dispersión, engadida á prisión preventiva, e que afecta a decenas de familiares e amig@s dos presos.

3º A liberdade provisoria de José Manuel Sanches e Santiago Vigo durante o tempo previo á celebración do xuízo, por ser inxustificable e innecesaria a permanencia en prisión.

4º A sensibilización informativa da sociedade galega para que faga súas as presentes reivindicacións, que consideramos concrecións elementares duns princípios xerais e básicos de Xustiza e Democracia.